Яңы депутаттарға тантаналы рәүештә танытмалар тапшырыласаҡ

Әле Дәүләт Йыйылышы-Ҡоролтайҙа ниндәй эштәр атҡарыла, яңы һайланған депутаттар ниндәй маҡсаттар менән йәшәй? Дәүләт Йыйылышы-Ҡоролтайҙың элекке вице-спикеры бүлмәһен бушатырға әҙерләнә. Хәҙер бында яңы һайланған депутат эшләйәсәк. Шағирә үҙе менән китаптарын, журналдар, докладтар һәм ҡулъяҙмаларын алып китә. Улар ижад юлында мотлаҡ кәрәк буласаҡ, ти, Йомабикә Ильясова. Депутат һайлаусылар менән осрашырға, уларҙың төрлө проблемаларын хәл итергә ярҙам итергә һәм халыҡ мәнфәғәтендә закондар ҡабул итеүҙә әүҙем ҡатнашырға тейеш. Йомабикә Ильясова вазифаһын тыныс күңел менән ҡалдыра. Дәүләт Йыйылышы-Ҡоролтайҙың яңы саҡырылыш депутаттары беренсе ултырышҡа йыйылғас ҡына яңы комитет рәйестәре, урынбаҫарҙары билдәләнәсәк. Башҡортостан парламентында даими рәүештә 22 депутат эшләйәсәк. Ҡалған 88-е депутатлыҡты төп эштәре менән бергә алып барасаҡ. Студент йылдарында уҡ әүҙем эш башлаған Гөлнур Ҡолһаринаны йәштәр ҙә, ололар ҙа яҡшы белә. Әле лә ул республиканың ижтимағи тормошонда ҡайнап йәшәй. Гөлнур Ғәлинур ҡыҙы дәүләт хеҙмәте менән берлектә йәмәғәт эшендә ла әүҙем ҡатнаша. Гөлнур Ҡолһарина Ҡыҙыл һайлау округы буйынса депутат итеп һайланды. Кампания ваҡытында ул урындағы халыҡ менән 260-тан ашыу осрашыу уҙғарған һәм ябай кешеләрҙең проблемаларын теркәп барған. Киләсәктә улар мотлаҡ закондарҙа сығылыш табасаҡ. Әле Дәүләт Йыйылышы-Ҡоролтайҙа алтынсы саҡырылыш депутаттарын ҡаршыларға әҙерләнәләр. Шуныһы билдәле быйыл парламентарийҙарҙың яртыһынан күбеһе яңырҙы. Уларҙың даими рәүештә эшләгәндәре шәхси автомобиль һәм ваҡытлыса торлаҡ менән тәьмин ителә. Парламенттың беренсе ултырышы һайлауҙан һуң 30 көн ҡалмай уҙғарыласаҡ. Уны йола буйынса иң өлкән депутат аса.

 

Читайте нас в Яндекс.Дзен