Балалар ғаиләлә

Йәш ирекмәндәрҙең был проектының атамаһы осраҡлы түгел. Изгелеккә йүнәлтелгән башҡа мәрхәмәт акцияларынан улар етемдәргә һәм сараһыҙҙан етемдәргә түгел, ә ата-әсәһе ҡыйын хәлдә ҡалған ғаиләлә тәрбиәләнгән балаларға ярҙам итә. Алина әсәй, Илдар атай. Был теремек балалар көн дә тиерлек күстәнәстәр алып килгән йәштәргә туған күреп шулай өндәшә. Тәмлекәстәр менән уйынсыҡтар ярҙамдың кескәй бер өлөшө генә. Хәйер, балалар ситтән ярҙам көтөп ултыра торғандарҙан түгел.  Уҡыуҙа яҡшы өлгәшәләр, өйҙө тәртиптә тоталар. Өлкәненә 13 кесеһенә 5 йәш тулған күп балалы әсәгә тол ҡалғас төшөнкөлөккә бирелмәҫкә ирекмәндәр ярҙам иткән. Тап шул позитив ауыр хәлгә тарыған ғаиләләргә йәшәү көсө бирә лә инде. Беҙҙең бурыс – ата-әсә иғтибарын бала мәнфәғәтенә йәлеп итеү, ти йәштәр. Ыңғай кисерештәр иһә ике яҡ өсөн дә етерлек. Ирекмәндәр ярҙамға мохтаж ғаиләләр менән халыҡты социаль яҡлау хеҙмәттәре аша танышҡан. Кемгә ниндәй ярҙам кәрәклеген үҙҙәре асыҡлай. Аҙ килемле, хәйерһеҙ ғаиләләр опека күҙәтеүе аҫтында икәне һәр кемгә билдәле. Беҙ балаларҙы етемдәр йортона урынлаштырыуға ҡаршы, ти йәштәр. Уларҙың ғаиләһен һаҡлап ҡалыу мөһим.  Бының өсөн берҙәмлекте нығытыу сараларын эҙләйҙәр.  Ике ай элек ике тиҫтәгә яҡын ирекмәнде берләштергән төркөм утыҙҙан ашыу ғаиләне үҙ ҡанаты аҫтына алған. Һәм бының менән генә сикләнергә йыйынмай. Йәштәрҙең  төп маҡсаты – матди ярҙам түгел, ә ауыр хәлдә ҡалған ғаиләләрҙе тормош йыуанысынан яҙҙырмау.Был ғаилә тәү ҡарашҡа имен. Биш йәшлек Марина фекер ҡеүәһен үҫтерер аралашыу-уйындарға мохтаж. Ата-әсә иһә ирекмәндәр ярҙамы менән торлаҡ төҙөкләндереү эшенә тотонған. Ирекмәндәр командаһы талап ителһә бағымсылар ярҙамын да файҙаланыу әмәлен күрә. Хәйриә эше әле башланып ҡына тора, маҡсаттар билдәле, теләктәштәр рәте киңәйә. Башҡарылған һәм башҡараһы эштәр тураһында йәштәр Инстаграмдағы төркөмөндә көндәлек мәғлүмәт биреп бара. Проектта ҡатнашырға теләгәндәргә ҡаршылыҡ юҡ.

Подпишитесь на нас в Google Новости