Депутаттар алдында ниндәй бурыстар ҡуйыла?

Константин Толкачев республиканың алтынсы саҡырылыш Дәүләт Йыйылышы — Ҡоролтай рәйесе итеп һайланды. Был туралағы ҡарар бөгөн Өфөлә парламенттың тәүге пленар ултырышында ҡабул ителде.

Фирҡәләр сәйәсәтенең айырылыуы ихтимал, әммә халыҡ ышанып тапшырған бурыстарҙы үтәгәндә депутаттар берҙәм, ғәҙел һәм талапсан булырға килеште. Башҡортостан парламенты төбәк именлеге һәм халыҡ мәнфәғәттәре өсөн эшмәкәрлекте әүҙем һәм яңы көстәр менән башлай.Дәүләт Йыйылышы-Ҡоролтай составының өстән ике өлөшө яңырған, йәғни 75 депутат вәкәләттәренә тәүге тапҡыр тотондо. Иң өлкәненә 73, йәшенә 25 йәш.

Беренсе пленар ултырышты традиция буйынса иң оло депутат аса. Валерий Шәрипов алтынсы саҡырылышҡа уңыштар теләп республика халҡының тормошон яҡшыртыр өсөн бар тырышлыҡты һаласаҡбыҙ, тип ышандырҙы. Кешеләрҙең талаптары көндән-көн арта, халыҡ социаль ғәҙеллек яҡлы.

Республика башлығы Рөстәм Хәмитов депутаттарҙы асыҡ власть сәйәсәтен бойомға ашырыуҙа берҙәмлеккә саҡырҙы. Дәүләт Йыйылышының беренсе ултырышы парламент эшен ойоштороу мәсьәләһенә арналды. Ҡоролтай рәйесе итеп бишенсе тапҡыр рәттән абруйлы һәм тәжрибәле Константин Толкачев һайланды. Уның урынбаҫарҙары вазифаһында Эльвира Айытҡолова, Рөстәм Ишмөхәмәтов һәм Вадим Старов раҫланды. Депутаттар  Ҡоролтайҙың даими эшләгән һигеҙ комитетын һәм уларҙың рәйестәрен һайланы.

Рөстәм Хәмитов “Парламент әйҙәүсе эксперт үҙәгенә әйләнергә тейеш, закондарҙы ҡабул итер алдынан депутаттар гражданлыҡ институттары, хөкүмәт менән кәңәшләшергә бурыслы”, — тип белдерҙе. Был һәр тармаҡты көйләгән ҡағиҙәләрҙе камиллаштырыу өсөн мөһим.

Ил президенты Владимир Путиндың өндәмәһендәге “Һеҙ халыҡ тауышын ишетеп етәкселеккә еткерергә бурыслы” тигән һүҙҙәрен ҡеүәтләп депутаттар һайлау алды кампанияһы барышында уҡ һыҙыҡ өҫтөнә алған наказдарҙы үтәүгә тотонған.

Үҙенең беренсе ултырышында Ҡоролтай 2018 йылдың көҙгө сессияһына закон проекттары эшенең яҡынса программаһын раҫланы һәм Рәсәй Федераль Йыйылышы Федерация советына Башҡортостан закондар сығарыу органы ағзаһын һайланы. Был вазифала Ирек Ялалов раҫланды.

Подпишитесь на нас в Google Новости