Рәсәйҙә сүп-сарҙы мотлаҡ сорттарға бүлеү талабы ғәмәлгә инә

Рәсәйҙә 2019 йылдан бөтә сүп-сарҙы мотлаҡ сорттарға бүлеү һәм ҡабаттан эшкәртеү талабы ғәмәлгә инә. Был йәһәттән республикала төбәк операторы ла һайлап алынды. Тик был өлкәлә йылдар буйына дауам иткән мәсьәләләр әле лә хәл ителмәй ҡала. Көнкүреш ҡалдыҡтарын сорттарға айырыу пункттары етмәү иң төп проблемаларҙың береһе.  Хәбәрсе. Сүп-сар полигондары етмәү һуңғы йылдарҙа донъялағы иң глобаль проблемаларҙың береһе булып ҡала. Шундай уҡ мәсьәлә менән бөгөн Өфө лә күҙгә-күҙ осрашты. Яңы Черкассы ауылы янындағы полигон үҫкәндән үҫә бара. Ә уның янында урынлашҡан сүп-сарҙы сортировкалау пункты килтерелгән сеймалды эшкәртеп өлгөрә алмай. 60-сы йылдар аҙағында Яңы Черкассы ауылы янында асылған полигон бөгөн сүп-сар яһалған тауҙы хәтерләтә. Өфөләге рәсми эшләгән берҙән-бер ҡаты ҡалдыҡтар полигонына йөҙәрләгән йөк автомобиле инеп көнөнә кәм тигәндә 6 мең кубометр ҡый ауҙара. Был мәсьәләне хәл итер өсөн заман талаптарына яуап биргән яңы сүп-сар эшкәртеү пункты төҙөр кәрәк, ти белгестәр. Яңы Черкассы ҡасабаһы янындағы полигонды яңыртыу йәһәтенән Өфө ҡалаһы ҡала округы советы яңы инвестиция программаһы ҡабул итә. 2016 йылдан ҡала халҡы сүп-сарҙы үтилләштереү буйынса тарифты өҫтәмә күләмдә түләй башлай. Йыйылған аҡсаға ҡала хакимиәте “Спецавтохозяйство” предприятияһы менән Яңы Черкассы ауылы янындағы полигонды реконструкцияларға, ҡаты көнкүреш ҡалдыҡтарын сортировкалау буйынса яңы заманса пункты төҙөргә тейеш. Ҡала советы сайтында ҡуйылған документтан күренеүенсә, 3 йыл эсендә халыҡтан ярты миллиард һумдан ашыу аҡса йыйылған. Тик “Спецавтохозяйство” предприятияһы вәкилдәре ни өсөн яңы полигон һәм сортировкалау пунты төҙөлмәй тигән һорауға аныҡ яуап бирә алманы. Өфө миллионлы ҡалалар араһында ҡаты ҡалдыҡтарҙы эшкәртеү йүнәлешендә ауыр хәлдәге муниципалитеттар исемлегендә. Ә бындай ваҡиғалар экология торошон тағы ла ҡатмарлаштыра. Әгәр ҙә бер-нисә йыл эсендә был мәсьәлә хәл ителмәһә киләсәктә ҙур экологик һәләкәт булыуы ихтимал. Хәбәр итеүебеҙсә, 2019-сы йылдың 1-се ғинуарынан  сүп-сар менән эшләү тәртибенә ҙур үҙгәрештәр индерелә. Көнкүреш ҡалдыҡтарын йыйыу, уларҙы сорттарға айырыу һәм эшкәртеү менән шөғөлләнәсәк төбәк операторҙарынан тыш, коммуналь квитанцияларҙа “Ҡалдыҡтар” тигән пункт та барлыҡҡа киләсәк. Торлаҡ хужаларының үҙҙәренә лә сүп-сар туплау мәҙәниәтенә өйрәнергә тура киләсәк.

Подпишитесь на нас в Пульс