Башҡортостан хужалыҡтарына тоҡомло таналар килтереү дауам итә

Был юлы Даниянан голштин тоҡомло 245 баш тана ҡайтты. Әле улар карантинға ябылған. Сит илдән килтерелгән һәүкәштәрҙең барыһы ла айырыуса хәүефле ауырыуҙарҙы асыҡлау йәһәтенән махсус тикшереүҙәр үтә. Таналар бер аҙна буйына юлда килде. Улар өсөн водителдәр яуаплы ине. Хәҙер малҡайҙар ҡурҡа-ҡурҡа яңы аҙбарға тула. Сит ил һәүкәштәре Башҡортостандың Саҡмағош районын төйәк итте. Бында уларҙан юғары сифатлы һәм иң мөһиме яҡшы күләмдә продукция алырға иҫәп тоталар. Йыл башынан Башҡортостан аграрийҙары 5 мең 300 баш тоҡомло тана һатып алған. Уларҙың 2 мең 400-ҙән ашыуы сит илдән килтерелгән. Ауыл хужалығы министрлығы мәғлүмәттәре буйынса, Ауырғазы, Ҡырмыҫҡалы, Мәләүез, Туймазы, Саҡмағош, Ҡалтасы, Әбйәлил һәм Ейәнсура райондары хужалыҡтары селекция эшенә ҙур иғтибар бүлә. Сит илдән килтерелгән һәүкәштәр 30 көн карантинда тотола. Таналар айырыуса хәүефле ауырыуҙарҙы асыҡлау өсөн махсус тикшереүҙәр ҙә үтәсәк. Голштин тоҡомло таналарға беҙҙең тәбиғәт шарттарына яраҡлашыр өсөн 3-5 тәүлек ваҡыт кәрәк. Ошонан һуң ғына һәүкәштәрҙең арыуы бөтә һәм уларҙан анализ ала башлайҙар. Белгестәр билдәләүенсә, таналар аҙбарҙарға ингәнсе, тәү сиратта, зарарлы ауырыуҙарҙы асыҡлау зарур. Сөнки, сирҙәрҙең башҡа малҡайҙарға таралыуы ихтимал. Хужалыҡта әле 8 мең баш мал иҫәпләнә. Уларҙың 2 мең 100-ҙән ашыуы һауын һыйыры. Тап голштин тоҡомлолары яҡшы һөт бирә. Бында тәүлегенә 50 тонна һөт һауылып, оҙатыла. Яңы килтерелгән таналар ғинуарҙан һуң быҙаулай башлар, тип көтөлә. Предприятие һауымды тәүлегенә 100 тоннаға еткерергә планлаштыра. Йыл аҙағына тиклем республикаға 12 меңдән ашыу тоҡомло мал ҡайтарылыр тип күҙаллана. Уларҙың 8 меңдән ашыуы — таналар. Мал һатып алған хужалыҡтарға хөкүмәт субсидия бүлә. Мәҫәлән, тана өсөн ул 50 мең һум күләмендә ҡаралған.

 

Подпишитесь на наш Telegram-канал