Торлаҡ төҙөлөшө өсөн ағас алыу тәртибе үҙгәрҙе

Башҡортостандың урман мөнәсәбәттәрен көйләү тураһындағы Законына индерелгән үҙгәрештәргә ярашлы хәҙер ағас тәү сиратта үҙ милкендә ер биләмәһе булған граждандарға бирелә. Шул уҡ документта билдәләнеүенсә, бүленергә тейеш ағас күләме 150-нән 110 кубометрға тиклем кәмей. Иҫке, әммә иҫтәлектәргә бай йортто яңыртыу зарурлығы Тамара Воронцова ғаиләһенең тура мәғәнәһендә башына төшкән. Үткән быуаттың егерменсе йылында төҙөлгән өйҙөң былтыр түшәме емерелгән. Тамара Родионовнаның күптән торлаҡ яңыртыу хыялы менән янған ейәнсәре йорттоң ағастан буласағын да күҙаллап ҡуйған.  Һәр кешенең йорт һалыу өсөн ағас алырға хоҡуғы барлығын Мария социаль селтәрҙәге мәғлүмәттәрҙән белгән. Мәсьәләне ентекләп өйрәнеп, мөмкинлектәрҙе барлап, дилянка алырға ҡарар иткәндәр. Тейешле ҡағыҙҙар йыйылған. Был өйгә тиҙҙән йөҙ йәш тула. Уның тирәләй биләмәлә өр-яңы йорт һалырлыҡ урын бар. Хужалар төҙөлөш эштәрен йәйелдерергә әҙер. Бары ағас һорап ғариза яҙырға ҡала. Ғаризаларҙы иһә республиканың урман хужалығы министрлығы ҡабул итә. Үҙең тураһындағы мәғлүмәттәрҙән тыш ҡайһы урманлыҡтан ағас алырға теләгәнде, кубометр күләмен һәм ағас төрөн билдәләргә кәрәк.Бүленәсәк ағас бушлай түгел. Уның хаҡы баҙарҙағынан арзаныраҡ, әммә урманды ҡырҡыу, бүрәнәләрҙе ҡайтарыу кеүек сығымдар хужалар иҫәбенә. Йорт төҙөлөшөнән тыш һәр кем биш йылға бер тапҡыр 50 кубометр ағасты торлағын капиталь төҙөкләндереү, шундай уҡ күләмде йорт-ҡура төҙөү, 3 йылға бер 15 кубометрлыҡ ағасты шул ҡоролмаларҙы йүнәтеү өсөн, һәм йыл һайын утынға 20 кубометр ағас алыу хоҡуғына эйә. Алып әҙерләнгән ағасты һатырға ярамай. Юғиһә кубометр күләменән ун тапҡыр күбрәк штраф түләтеү ҡаралған.2015 йылда халыҡҡа 1 миллион 100 мең кубометр ағас бүленгән. Төп күләм шәхси йорт һалыу өсөн алынған. Шулай уҡ кешеләр йорт-ҡура төҙөлөшө, ремонт һәм утынға 500 мең кубометрға тиклем ағас ҡулланған. Мария Ғафарованың ғаризаһына иһә урман хужалығы министлығы белгестәре 15 көн эсендә яуап бирергә тейеш. Мәсьәлә ыңғай хәл ителгән осраҡта йорт төҙөүселәргә билдәле урмансылыҡ менән федераль закондар талабына ярашлы килешеү төҙөргә ҡала. 



Последние новости

Яндекс.Метрика