Әбйәлил районында һөмбәш балыҡтарын үрсетеү буйынса завод ҡасан төҙөлөр?

Бер нисә йыл инде Әбйәлил районында һөмбәш балыҡтарын үрсетеү буйынса завод төҙөләсәге тураһында һүҙ алып барыла. Санкциялар шарттарында төбәк өсөн мөһим предприятиеның төҙөлөшө көнүҙәккә сыға. Урындағы етештереүселәргә ул яңы мөмкинлектәр асыр ине. Ләкин, эш урынынан ҡуҙғалмай. Был кадрҙарҙы беҙ апрель аҙаҡтарында төшөрҙөк. Урал аръяғы райондары кибеттәрендә йылға-күлдәрҙән тотолған балыҡ бөтөнләй юҡ. Магазиндарҙа диңгеҙ балыҡтары ғына һатыла. Ә ҡайһы берҙәрендә бөтөнләй күренмәй. Әйткәндәй, был күренеш бөтә республикаға хас. Башҡортостанда тотолған балыҡ һирәк магазиндарҙа ғына һатыла. Инде тиҫтәләгән йыл Яҡты-күл базаһында һөмбаш балыҡтарын үрсетеү буйынса завод төҙөү тураһында һүҙ бара. Ул Урал аръяғы балыҡсыларын селбәрәләр менән тәьмин итергә тейеш ине. Ләкин эш бер нисек тә ҡуҙғалмай, ти урындағы балыҡсылар.Урал аръяғында тиҫтәләгән күл бар. Әбйәлил һәм Учалы райондарында ғына етмешләгән тәбиғи һыу ятҡылығы иҫәпләнә. Уларҙа рәхәтләнеп бөтә төр балыҡ үрсетеп, килем алырға булыр ине лә. Тик, балыҡсыларға Төмән йә башҡа өлкәләрҙән ҡиммәткә селбәрә һатып алырға тура килә. Мәсьәлә буйынса беҙ Әбйәлил районы хакимиәтенә мөрәжәғәт иттек. Ләкин унда яуап бирергә тартындылар. Әгәр, селбәрә үрсетеү хужалығы төҙөлһә, төбәк халҡын сифатлы һәм яңы ғына тотолған балыҡ менән тәьмин итеү мөмкинлеге буласаҡ, тип иҫәпләй эшҡыуарҙар.Белгестәр фекеренсә, заводты сафҡа индереү менән төбәктә балыҡсыларҙы селбәрәләр менән тәьмин итеү мәсьәләһе хәл ителәсәк.  Йылға-күлдәрҙә балыҡ  та артасаҡ. Һөмбаш төркөмөнә ҡараған балыҡтар деликатес иҫәпләнә. Уны тотҡас та ҡулланыр кәрәк, сөнки ите тиҙ арала боҙолоуы мөмкин. Тәмле һәм ҡиммәтле балыҡ ҡасан халыҡ өҫтәленә барып эләгер һуң. Белгестәр иҫәпләүенсә, заводтан ҡиммәтле балыҡтарҙың селбәрәһен һыу объекттарына ебәреп, бер нисә йылдан һыу майҙандарының һәр гектарынан 90 килограмдан алып 150 килограмға тиклем һөмбаш балығын алыу мөмкинлеге буласаҡ. Тик әлегә беҙҙең йылға-күлдәр файҙаһыҙ.



Последние новости

Яндекс.Метрика