Кем ғәйепле йәки бәләкәй бала михнәттәре

Ҡырмыҫҡалы районында еңел холоҡло ҡатындың ике йәшлек балаһына битарафлығы аяныслы хәлгә алып килде. Яҡынса мәғлүмәттәр буйынса һәм был әҙәм аҡтығының яҡындары әйтеүенсә, сабыйҙы араҡыға алмаштырыуҙары ихтимал.  Хәҙер был эш хоҡуҡ һаҡлау органдарының етди күҙәтеүенә алынды. Ҡырмыҫҡалы районында ҡот осҡос фажиғәғә тарыған ике йәшлек ҡыҙҙың өләсәһе беҙҙең менән һөйләшеүҙән баш тарта. Уны  аңларға була – ейәнсәренең киләсәге өсөн борсола. Баланың йөҙөн күрһәтмәйбеҙ тигәс кенә, йортона индерҙе. Фажиғә тураһында һорашҡас,  ире эштә саҡта, әсәһе баланы төнгә ҡарай өйҙән алып сығып киткәне асыҡланды.Ейәнсәрен дауаханан өләсәһе үҙенә Өфө районына алып ҡайтҡан. Һаулығына ҡурҡыныс янамай. Әммә баланың аҫлығындағы ҡан, өләсәһен хафаға һала һәм ул ҡыҙҙы яҡындағы дауаханаға алып барырға ҡарар итә. Ҡатындың фараздары дөрөҫкә сыҡты. Ҡыҙҙың документтары әлегә ҡулында булмау сәбәплеме, әллә ҡурҡыныс диагнозлы күсермәне күрепме, табиптар үҙҙәренең өҫтөнә яуаплыҡ алырға теләмәне.   Ҡырмыҫҡалы районының үҙәк дауаханаһында иһә баланы ҡабул иттеләр. Сабыйға ентекле медицина тикшереүе үткәрҙеләр. Баланың хәле ҡәнәғәтләнерлек түгел, яралары оҙаҡ йүнәлә. Артабан тикшереү артыҡ булмаҫ тигән фекерҙә урындағы табиптар. Аяныслы хәлдән һуң ҡыҙҙы дауаханаға атаһы алып килгән. Табиптар әсәһенең килеүен талап итһәләр ҙә, ул бер тапҡыр ҙа күренмәгән. 5 көн үткәс, өләсәһе ейәнсәрен алырға килгән. Кисектергеһеҙ  күрһәтмәләр булмағас, ҡыҙҙы дауахананан сығарғандар.  Район хакимиәтенән хәбәр итеүҙәренсә, был бала тәрбиәләнгән ғаилә 2013 йылдан бирле имен булмаған ғаиләләр исемлегендә иҫәптә тора. 2014 йылда ҡатынды әсәлек хоҡуғынан мәхрүм итергә судҡа мөрәжәғәт иткәндәр. Әммә ҡатындың ваҡытлыса эсеүен ташлап тороу сәбәпле, суд әсәлек хоҡуҡтарынан мәхрүм итмәгән. Гражданлыҡ никахы менән йәшәп ятҡан ғаилә ағзалары йыш эскән, күрше-күләндәре менән дә аралашмаған. Был ғаиләнең йорто урамда айырылып тора. Буяуҙары уңған, ҡоймалары емерелгән. Газ үтмәгән, мунса ла юҡ.Беҙ килеүгә ҡыҙҙың ата-әсәһе йәшәгән йорттоң ишегенә йоҙаҡ эленгән. Әммә тышынан күренеүенсә йорт бысраҡ хәлдә, таушалған. Хатта тәҙрәләре лә емерелеп бөткән.  Ишек алдында ла тәртип юҡ: иҫке коляска, уйынсыҡтар менән бергә сүп-сар ята. Өйҙә булмағастын, ҡатынға шылтыратып белешергә булдыҡ.Әсә балаһы менән булған фажиғә тураһында һөйләшеүҙән баш тартты. Республика тәфтиш комитетынан хәбәр итеүҙәренсә, ҡатын балаһы менән күңел асырға ауылдың 42 йәшлек иренә барған һәм шунда ҡуна ҡалған. Был 42 йәшлек ир бәләкәй баланы мыҫҡыллауҙа ғәйепләнеп ҡулға алынған һәм уға ҡарата енәйәт эше асылған.  Енси енәйәттә ошо ауылдың 29 йәшлек тағы ла бер ирҙең ҡатнашлығы булыуы ихтимал. Әсәһе улының был енәйәт эше буйынса шаһит булараҡ ҡына үтеүе хаҡында раҫларға маташты. Әммә аҙаҡ егет үҙе килеп сығып, был енси енәйәткә уның бер ҡыҫылышы ла юҡлығын белдерҙе.Интернет селтәрендә был фажиғә тураһында хәбәр тиҙ таралды. Мәғлүмәтте күреп ҡалғас, баланың яҙмышына битараф булмаған замандаштарыбыҙ, аҡса йыйып, беренсе кәрәк-яраҡтар, карауат, ашамлыҡтар алып өләсәһенә илткәндәр. Әле улар ҡыҙҙың киләсәге өсөн борсола. Ике йәшлек ҡыҙ һөйләшмәй, өндәр генә сығара. Был бала менән тейешенсә шөғөлләнмәгәндәрен раҫлай.  Баланың артабанғы яҙмышы өләсәй кешене лә хафаға һала. Опека хеҙмәткәрҙәре баланы ҡыҙлыҡҡа алырға теләүсе ғаиләләр бар тип хәбәр итә. Әммә атаһы ҡыҙын үҙе тәрбиәләргә теләк белдергән. Тик уның атайлыҡ хоҡуғы суд аша иҫбатланмаған. Әлегә сабыйҙың артабанғы яҙмышы билдәһеҙ.

Яндекс.Метрика