Өфөлә этник ауыл асылды

Милли йолалар, халыҡ көнкүреше, республиканың тарихы, бөгөнгөһө һәм киләсәге. Халыҡ-ара саммиттар көндәрендә ошо турала бар мәғлүмәтте бер урында туплаған этник ауыл ҡапҡаһы бөгөндән теләгән һәр кем өсөн асыҡ.  Виктория исемле волонтер ҡыҙ халыҡ-ара саммиттар көндәрендәге кеүек үк һәр кемде шифалы сәй менән һыйлай. Бында ихлас ҡунаҡсыллыҡ хөкөм һөрә. Ете тирмәнең һәр ҡайһыһында алсаҡ ҡыҙҙар һәм егеттәр ҡунаҡты ҡаршы алып бар ҡыҙыҡһындырған һорауына яуап бирә. Сәйәхәтте беренсе тирмәнән башлайбыҙ. Икенсе тирмә кейеҙ баҫыу, ағас семәрләү, ҡымыҙ бешеү, бал ҡыуыу кеүек халҡыбыҙҙың боронғо кәсептәре менән таныштыра. Өсөнсөһө Башҡортостандың тәбиғи байлыҡтарын тасуирлай. Бында нефть менән алтынды тотоп ҡарарға, ә мозаика оҫталары башҡарған һоҡланғыс картиналар аша ер өҫтөндә түгелеп ятҡан затлы таштар ханлығына барып сығырға мөмкин.  Дүртенсе тирмәлә бал менән ҡымыҙҙы тәмләп ҡарарға, бишенсеһендә республикала йәшәгән төрлө милләт халыҡтарының татыу йәшәүен һүрәтләүсе дуҫлыҡ ағасына таҫма бәйләргә тәҡдим ителә. 21-се быуаттың шау-шыулы урамдарынан тын сәхрәгә, йылҡы өйөрҙәре йөрөгән йәйләүгә. Был тирмә – ваҡыт машинаһы. Теләгән кейемдә теләгән быуатҡа сәйәхәт ҡылырға мөмкин. Етенсе тирмә иһә ҡунаҡтарҙы Өфөнөң хыялдағы киләсәген төҫмөрлөргә саҡыра. Ватан паркы проектын уйлап табыусы Илдар Нуретдинов ете тирмә ауылында беҙ республика тураһында заманса белешмә тупларға тырыштыҡ, ти. Өфө амфитеатры биләмәһендәге Ватан паркы башҡала халҡын һәм ҡунаҡтарҙы сентябрь айына тиклем һөйөндөрәсәк. Киләсәктә ул Өфөнөң йөҙөк ҡашына әйләнер, тигән өмөт бар. 

 

Яндекс.Метрика