Төҙөүселәргә дәүләт наградалары тапшырылды

Бүләкләү тантанаһы Республика Йортонда үтте. Рәйлә Ильясова крансы һөнәрен төптән уйлап һайлаған. Мәктәпте тамамлағас та ошо эшкә өйрәнергә теләүен белдергәс, һөнәри уҡыу йортона йәше тулмау сәбәпле алмайҙар. Маҡсатыма тоғро ҡалып икенсе, өсөн тапҡыр килдем, барыбер теләгемә өлгәштем, ти ул. Төҙөлөш тармағында оҙаҡ йылдар эшләгән, үҙ һөнәрен яратҡан, хеҙмәттәштәрен ихтирам иткән һәм фиҙаҡәр эше өсөн лайыҡлы исем алған төҙөүселәр араһында башҡала төҙөлөш предприятиеһы монтажсыһы Хәмзә Хәбиров та бар.Бөгөн был күркәм залда халыҡ тормошон яҡшыртыуға һәм ил именлеген нығытыуға нигеҙ һалыусы һөнәр эйәләре йыйылды. Һеҙҙең тырышлыҡ менән меңәрләгән ғаилә йорт туйлай, ҡала–ауылдарҙа йөҙләгән бина сафҡа инә, урам-ихаталар төҙөкләндерелә. Өфөлә халыҡ-ара саммиттарҙы юғары кимәлдә ойоштороп, сит ил ҡунаҡтары хәтеренә матур тәҫораттар һалыуға ла һеҙ тос өлөш индерҙегеҙ, тине тәбрик һүҙендә республика башлығы хакимиәте етәксеһе Сергей Молчанов. Бүләкләү тантанаһынан һуң төҙөлөш тармағы алдынғылары дөйөм фотоға төштө һәм Өфөнөң иң гүзәл урындары буйлап сәйәхәткә юлланды.Төҙөүсе  — кешеләргә йорт йылыһы менән көнкүреш уңайлыҡтары, ауыл-ҡалалар йөҙөнә йәм биреп тормошта именлек теләүсе иң тыныс һөнәр. Илдең үҫешен тәьмин итеүсе ошо һөнәр эйәләре байрамда ғына түгел, һәр саҡ ихтирамға лайыҡ. 

Яндекс.Метрика